tve movistar+
Babesle
Ofizialak
65. Donostia Zinemaldia
22/30 Iraila 2017 - #65ssiff

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 61. Edizioa 2013  > Zinemaldiaren Egunkaria > «Buah txabal, a ze flipea!»
Zinemaldiaren Egunkaria » BELODROMOA
«Buah txabal, a ze flipea!»
Larunbata, 2013(e)ko irailak 21

Haritzaren gerizpera jarririk pasadizo txiki bat kontatzera natorkizue. Egunkari honetan idatzi gabeko lege bat dugu, urtero-urtero lankide hasiberriari egokitu ohi zaio Zinemaldiak haurrei zuzendutako belodromoko lehen emanaldiaren berri ematea. Aurten, ordea, ez dakit zergatik, lege hori irauli eta kazetari beteranoenari tokatu zaio hasiberriarena egitea. Aro berri baten abiapuntua ote? Auskalo. Edonola ere, har dezagun relaxing cup of kafesne bat zopekin eta gatozen harira.

Goizeko bederatzi eta erdiak dira, eta Anoeta belodromoko ingurumariak paraje mortua dirudi. Aitzitik, halako batean, autobus ilara amaigabea antzematen hasia da. Lehen autobusa iritsi, bere haur ‘karga’ paratu, eta hurrengoa heltzen da. Horrela, berrogei autobus inguru umez hustu arte. Gipuzkoako bazter orotik etorriak, Zarautz, Hondarribia, Azkoitia, Donostia, Irun, Andoain, Oiartzun eta Hernani, guztira 2.200 haur izan dira atzoko emanaldira bertaratutakoak.

Harrigarria da Estitxu Marzo Izaga arduradunak eta honen hogei lankideek halako ume-oldea gobernatzeko eta belodromora sarrarazteko darabilten logistika “Aurtengoarekin 21 urte daramazkit ekitaldi honen antolakuntzan, eta beti gertatzen da ezustekoren bat, hala ere, -dio Estitxuk- lehendabiziko eguna izateko dena ongi ateratzen ari da, printzipioz arazorik gabe”.

Areto barruan, lehen hezkuntzako, alegia 6 eta 12 urte bitarteko umeak beren eserlekuetan kokatuz doaz, belodromoko harmailak inurriak bailiran estaltzen dituztelarik, aretozain eta irakasleen laguntzarekin, hori bai. Batzuk bihurri baina gehienak txintxo antzean, aretoaren eta pantailaren neurriekin txundituta daude: “Buah txabal, a ze flipea!”. Halere, nola ez, bada “bah, nik uste nuen pantaila handiagoa izango zela” irizten dionik ere.

Aurkezle lanetan diharduen Aitziber Garmendiak bertaratutako ikastola eta ikastetxe desberdinen zerrenda animoso oihukatzen ari den bitartean, umetako batek kolpea hartu du ukondoan barandaren kontra jotzeagatik. Lasai, hortxe dira prestu Gurutze Gorriko lagunak. “Ez da ezer - io gazteak- odol pixka bat besterik ez”. Dena kontrolpean, beraz.

Aurtengo pelikula, Ricardo Ramón eta Angel Izquierdo zuzendarien El corazón del roble (Herensugeak - Haritzaren bihotza) animazioko filma da. Gertakari arraroen ondorioz, Herensugearen Mendixkako klima aldatzen ari da. Tenperaturek behera egin dute bat-batean, eta Lurra hotzean eta iluntasunean murgildu da. Basoa hiltzen ari da, eta Robin basozainak gaiztakeriaren aurka borrokatzen lagun diezaioten erregutu die jainkoei.

Filmaren lehen fotogramen proiekzioarekin batera, buila eta zalaparta isiltasun bilakatzen dira. Haurrek begiak zabal-zabal irekitzen dituzte, laser erakusle batekin pantaila zirikatzen ari den gazte harroxkoa izan ezik. Irakaslearen errieta jaso eta kitto.

Finean, hemen ez da glamourrik, ezta beharrik ere. Haurren zinemazaletasuna piztea helburu duten emanaldi goiztiar hauetan umeen zirrara eta pelikulak dira izar nagusiak.

S.B.

 

© Donostia Zinemaldia | Desarrollado por: Yo Miento Producciones

Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea