tve movistar+
Babesle
Ofizialak
65. Donostia Zinemaldia
22/30 Iraila 2017 - #65ssiff

itxi
Bete formularioa zure datuekin, erregistratutako erabiltzaileentzako edukiak ikusteko
Sakatu hemen
Ez duzu pasahitza gogoratzen? Sakatu hemen

itxi


Oraindik ez duzu posta elektronikoa balioztatu. Posta elktroniko bat bidali dizugu, ondoko esteka sakatu behar duzu kontua balioztatzeko

Hemen zaude: Lehen orrialdea > 64. Edizioa 2016  > Berriak > Culinary Zinema saileko zazpi filmek janariaren jatorriei, tradizioei eta etorkizunari buruzko istorioak kontatuko dituzte
Culinary Zinema saileko zazpi filmek janariaren jatorriei, tradizioei eta etorkizunari buruzko istorioak kontatuko dituzte
Sei dokumental eta fikzio-film luze bat lehiatuko dira Tokyo Gohan saria eskuratzeko, zinema eta gastronomia bateratzen dituen Donostia Zinemaldiaren sailean
Emanaldi eta afarietarako sarrera-txartelak irailaren 5ean jarriko dira salgai
Asteazkena, 2016(e)ko abuztuaren 31

Culinary Zinemak, zinema eta gastronomia uztartzen dituen sailak, seigarren urtea beteko du aurten. Berlineko zinema-jaialdiarekin lankidetzan sortua eta Basque Culinary Centerrekin batera antolatua, sailak zazpi film proposatzen ditu aurtengo lehiaketarako: guztiak dira dokumentalak, bat izan ezik. Turkiako, Argentinako eta Kalifornia Behereko sukaldaritza; Japoniako merkatuak, Taiwango errezeta-liburu familiarra, eta intsektuak eta janari-soberakinak sukaldaritzaren oinarri gisa: horra hor zer osagai izango dituen 64. Donostia Zinemaldiko menuak.

Saila Theater of Life filmak inauguratuko du, Refettorio Ambrosiano jantoki sozialaren esperientziaren berri ematen duen lanak. Iaz ere Culinary Zinemako dokumental batean, Chef's Table "Massimo Bottura" filmean, protagonista izandako Massimo Botturak sustatu zuen jantoki hori, 2015eko Milango Erakusketa Unibertsalean. Munduko 40 sukaldari ospetsuenetako batzuk bildu zituen han, eta Erakusketako pabiloitan alferrik galdutako elikagaiak soilik baliatuz prestatu zituzten jakiak. Peter Svatek kanadar zuzendariak egin du filma. Bere lanetan, askotariko gaietan sakondu du: adibidez, borroka-arte mistoak edo Argentinan lapurtutako haurrak.

Mariano Cohn eta Gastón Duprat zuzendari parearen azken lana, El ciudadano ilustre, Urrezko Lehoia lortzeko lehiatuko da Venezian. Todo sobre el asado filmean, hain zuzen ere, izenburuan hitzemandakoa aztertuko dute: argentinar identitatearen funtsezko alderdi bat irudikatzen duen jaki eta erritual batera eramango gaituzte. Bidaia hori kontatzeko, begirada batetik zorrotza eta bestetik lotsagabea aukeratu dute Cohnek eta Dupratek.

Bugs filmean elikaduraren etorkizuna ageri zaigu, gutxienez René Redzepiren Nordic Food Lab-en ikusmoldean. Danimarkako ekoizpen hori Tribeca eta Edinburgoko zinema-jaialdietarako hautatu dute. Andreas Johnsenek laborategi esperimental horretako bi sukaldariri jarraituko die, mundu osoan kontsumitzen diren intsektuak ikertzen ari direla.

Baja Taste lana ere geroarekin lotuko da, gero hurbilagoarekin, ordea. Roberto Nájera mexikar zuzendariak zuzendu du dokumentala. Kalifornia Beherean garatzen ari den mexikar sukaldaritza berria dago filmaren ardatz-gunean, eta lau sukaldariren lanaren bitartez aztertuko da fenomeno gastronomiko hori.

Mitsuhito Shiradaren hirugarren filmak, Mama, gohan mada? / What’s for Dinner, Mom?, Tae Hitoto idazle eta aktorearen nobelan du oinarria: emakume bat Japoniatik Taiwanera emigratu zuen bere amaren bizitza berregiten hasiko da, familiaren garai bateko etxean eskutitz- eta errezeta-kutxa bat aurkitu ondoren.

Luis González, iaz Culinary Zinemarako hautatutako Cooking Up a Tribute filmaren zuzendarietako batek, Roca anaiek turkiar gastronomian zehar egindako ikasketa-prozesuari jarraituko dio The Turkish Way filmean. Sukaldaritza mota hori munduko ezezagunetakoa, sendoenetakoa eta zaharrenetakoa da.

Klausura filmak munduko arrain- eta itsaski-merkatu handienera eramango ditu ikusleak. Naotaro Endo-k, Guzen no tsutsuki film independente sarituaren egileak, Tsukiji Wonderland dokumentala zuzendu du, duela 80 urtetik Tokio erdigunean kokatutako Tsukiji merkatuari buruz. Azoka horretako arraina eta itsaskiak washokuaren, Japoniako sukaldaritza tradizionalaren, lehengaiak dira.

Emanaldien esperientzia, aurreko urteetan bezala, filmaren edukiari lotutako afari batekin osatuko da. Refettorio Ambrosiano jantokian parte hartu zuen Basque Culinary Centerreko irakasle eta sukaldari taldea izango da inaugurazio afariaz arduratuko dena. Illarra erretegiko Joxean Eizmendi Todo sobre el asado filmeko lantaldearekin arituko da, eta Mehmet Gürs turkiar sukaldaria bere herrialdeko produktu tradizionaletatik abiatuko da oturuntza prestatzeko. Cheung Yat Singek, Tim Ho Wan jatetxe-katearen arduradunak (Michelin izar bat du Hong Kongeko lokalean), Mama, Gohan Mada? / What's for Dinner, Mom? filmeko familia-errezeta taiwandarrekin bat datorren menu bat prestatuko du, ni neu jatetxeko sukaldari Mikel Gallorekin batera. Tijuanan bizi den Javier Plascencia sukaldaria Baja Tasteri lotutako menuaz arduratuko da; Roberto Flore sardiniar sukaldariak, Nordic Food Lab laborategiko buruak, Bugs filmean oinarritutako afari bat sortuko du, eta, azkenik, klausura Ricardo Sanz sukaldariaren esku geratuko da. Hark kabuki sukaldea delakoa garatu du, errezeta-liburu japoniar-mediterraneo bat. Illarra eta ni neu jatetxeetan egingo diren bi afariak izan ezik, gainerakoak Basque Culinary Centerrek hartuko ditu berean.

Emanaldi eta afarietarako baterako sarrera-txartelak irailaren 5ean jarriko dira salgai, 70 euroko prezioan, Zinemaldiaren eta Kutxabanken webguneen bitartez. Filmak ikusteko soilik diren txartelak, aldiz, irailaren 11tik aurrera jarriko dira salgai, 7,20 euroan.

Culinary Zinemaren babeslea Nespresso etxea da; horrez gain, zinema eta gastronomia fusionatzea helburu duen Pictures dept. co. ltd.-rekin lankidetzan arituko da saila. Pictures dept. co. ltd.-k aukeratutako epaimahai batek 10.000 euroz hornitutako Tokyo Gohan saria esleituko dio Culinary Zinema sailean programatutako filmetako bati, eta filmaren nazioarteko banatzaileari edo, halakorik ez badago, ekoizleari emango zaio.

 
FILMEA
Irailak 17:
 

Theater of Life
Peter Svatek  (Kanada)
Inaugurazioa

2015eko Milaneko Erakusketa Unibertsalean, "planeta elikatzea"ri buruzkoan, erakusketan sortutako janari-hondakinak pobre eta etxerik gabekoentzako plater bihurtzen dituzte munduko chef handienek.

Irailak 18:
 

Todo sobre el asado
Mariano Cohn, Gastón Duprat  (Argentina - Espainia)

Todo sobre el asado Argentinaren errorik sakonenera eginiko bidaia bat da. Haragi errea jaki bat da, baina baita erritual bat ere. Primitiboa eta garaikidea da, basatia eta dotorea, artea eta zientzia. Fenomeno gutxi dago nazio-identitatearen oinarrizko bereizgarriak haragi erreak bezain ondo adierazten dituena, originaltasunez eta zehaztasunez. Lehen aldiz, begirada zorrotz eta lotsagabe batez so egiten dio film batek tradizio ia sakratu honi.

Irailak 19:
 

The Turkish Way
Luis González  (Espainia)

The Turkish Way bidaia-egunkari gisako bat da, eta hiru Roca anaiek Turkian zehar munduko gastronomia ezezagun, ahaltsu eta antzinakoenetako bat ezagutzeko prozesuan izandako bizipenak kontatzen ditu.

Irailak 20:
 

Mama, Gohan Mada? / What's for Dinner, Mom?
Mitsuhito Shiraha  (Japonia)

Bi ahizpa, Tae eta Yo, beren antzinako etxera itzuli dira, etxea laster eraitsiko dutela eta. Familiaren oroigarrien artean garbiketa egiten ari direla, Taek kutxa bat aurkituko du, eta barruan amak, hogei urte lehenago hilak, idatzitako errezetak eta eskutitzak. Gutun horietan, amak bizitzan igarotako zailtasunen berri izango du Taek: Japoniatik Taiwanerako bizitoki-aldaketa, taiwandar senarraren heriotza, eta minbiziaren aurkako borroka. Taek Taiwanera bidaiatuko du, amaren iraganari jarraika eta familiarentzat prestatu zituen platerak gogora ekarriz.

Irailak 21:
 

Baja Taste (Baja TAste)
Roberto Nájera  (Mexiko)

Kalifornia Behereko sukaldaritza nazioartean goraipatua da. Dokumental honek sukaldaritza berezi hori sortu eta garatu duten lau chefen sormen-iturriak arakatzen ditu. Chefetako bakoitzaren gogoan eta ariman zehar eginiko bidaia bat da. Helburua: mundu mailan fenomeno gastronomiko bat bihurtzen ari den mexikar sukaldaritza berri hori sortzeko inspirazioa nola pizten den aurkitzea.

Irailak 22:
 

© Andreas Johnsen
Bugs
Andreas Johnsen  (Danimarka)

Ben, Josh eta Roberto, René Redzepi-ren Nordic Food Lab laborategi esperimentaleko hiru chef gazte eta karismadun, elikaduraren etorkizuna izango omen den elikagaiaren inguruan ikertzen ari dira: mundu osoan barrena kontsumitzen diren intsektuak.

Irailak 23:
 

Tsukiji Wonderland
Naotaro Endo  (Japonia)
Klausurako filma

Tsukiji munduko arrain eta marisko merkaturik handiena da. Duela 80 urte inguru eraiki zuten, Tokio erdialdean, eta bere historia aberatsean zehar lilura etengabea sortu du jendearengan. Tsukijiko arraina eta mariskoa Japoneko sukaldaritza tradizional edo washokuaren muina dira, eta washokua Gizateriaren Kultur Ondare Immateriala izendatu zuen UNESCOk 2012an. Filmak Tsukijin lan egiten dutenen pasioa eta Japoniako sukaldaritza tradizionalaren esentzia erakusten ditu.

Egitaraua
Datak - Filma
 
Jatetxea
 
Sukaldariak

Inaugurazioa. Larunbata 17
• THEATER OF LIFE
 
Basque Culinary Center
 
Basque Culinary Centerreko sukaldari-irakasleen taldea

Igandea 18
• TODO SOBRE EL ASADO
 
Asador Illarra
 
Joxean Eizmendi

Astelehena 19
• THE TURKISH WAY
 
Basque Culinary Center
 
Mehmet Gürs
 

Asteartea 20
• MAMA, GOHAN MADA? / WHAT´S FOR DINNER, MOM?
 
ni neu
 
 Mikel Gallo & Cheung Yat Sing

Asteazkena 21
• BAJA TASTE
 
Basque Culinary Center
 
Javier Plascencia

Osteguna 22
• BUGS
 
Basque Culinary Center
 
Roberto Flore

Klausura. Ostirala 23
• TSUKIJI WONDERLAND
 
Basque Culinary Center
 
Ricardo Sanz

Sukaldariak

basque culinary centerreko sukaldari-irakasleen taldea

Refettorio Ambrosiano jantokiko esperientzian parte hartu zuen chef talde batek prestatuko du inaugurazioko afaria. Chef ez ezik, Basque Culinary Centerren irakasle ere badira. Basque Culinary Centerreko chef-irakasleak unibertsitateko graduan eta masterretan aritzen dira irakaskuntzan. Nazioarteko sukaldariak dira, ibilbide profesional luzekoak. Metodologia berritzaileekin parte hartzen eta gidatzen dute, hasi betiko gastronomiatik, eta sukaldaritza profesionalaren abangoardiako teknika aurreratuen garapenetara arte.


JOXEAN EIZMENDI

Filmeko lantaldearen lankidetzarekin, Joxean Eizmendik den-dena emango du, haragi-puska guztiak sartuko ditu burruntzian. Donostiako sukaldariak Ilarra jatetxea zuzentzen du; han, betiko euskal sukaldaritzaren alde egiten du, sormen-ukituekin eta sasoiko produktu onenen aukera zorrotz batekin.


MEHMET GüRS

Mehmet Gürs turkiar sukaldaria 19 jatetxe eta kafetegiren bazkide da, baita goxotasun handienarekin tratatutako produktu tradizionalen defendatzaile bat ere. Teknika zahar eta berriak nahastuz eraldatzen ditu horiek. Ikerkuntzan eta sormen-prozesuetan aritu da, chef talde batekin, arduraldi osoko antropologo batekin, herri txikietako biztanleekin eta ama nahiz aitonekin; hala, sare zabal bat eta eremu horretako ohitura, produktu eta tekniken ezagutza sakon bat garatu ditu.
 

 MIKEL GALLO & cHEUNG YAT SING

Cheung Yat Sing sukaldaria, zeinak hogeita hamar urtetik gora baitaramatza oso-osorik Dim Sum janaria prestatzen, Tim Ho Wan taldearen chef exekutiboa da. Tim Ho Wan jatetxe-katea janari mota kantondar horretan espezializatuta dago, eta Taiwanen, Singapurren, Australian, Filipinetan eta Hong Kongen ditu lokalak. Azken horretan, Michelin izar bat dauka. Bestalde, ni neu jatetxean, Mikel Gallok gertutasun-bokazioa duen abangoardiako sukalde bat zuzentzen du. Erabat lortzen du, betiko errezetetan oinarritutako baina teknika garaikideekin interpretatutako sukaldaritza eskuragarri bati esker. Emaitza jatetxearen ingurunearekin, Kursaal Jauregiarekin, mimetizatzen den gastronomia-proposamen bat da.


JAVIER PLASCENCIA

Tijuanan (Mexiko) bizi den sukaldari hau Kalifornia Behereko sukaldaritzari estilo berritzailea eta jasangarria emanez nabarmendu da. Misión 19 jatetxean garatzen duen sukaldaritzaren izarrak bertako eta sasoiko osagaiak dira; eskualdeko landetxe eta abeletxetatik, itsaso eta lurretik datoz. Defendatzen duenez, Tijuanako sukaldaritza berpiztea da Misión 19 jatetxearen egitekoa.
 

ROBERTO FLORE

Sardiniar chef hau Nordic Food Lab ikerkuntza-laborategiko sukaldariburua da. Laborategia René Redzepik sortu zuen, Kopenhagen. Sukaldari hau biodibertsitate handiz inguratuta hazi zen, eta agronomia ikasi zuen; orain, bere lanbide bihurtu du bizimodu eta grina hori.
 

RICARDO SANZ

Ricardo Sanz Masao Kikuchi-ren eskutik sartu zen Japoniako sukaldaritzaren artera, hark Tokyo Taro mitikoan elkarrekin lan egitea eskaini zionean. Lau urteko ikastaldi baten ondoren, lehenengo Kabuki jatetxea sortu zuen, veste bazkide batzuekin batera. Bera izan zen hango sukaldari burua, eta han garatu zuen Kabuki sukaldaritza gisa ezagutzen dena. Egunero, bere errezeta japoniar-mediterraneoak defendatzen ditu Kabukik. Jatetxe horretan, Ricardo Sanzek bertako merkatuko produktuei zabaltzen dizkie betiko errezeta japoniarrak. Kalitate eta sormen maila handiko jakiak lortzen ditu, eta uneoro agertzen dituzte zapore guztiz garbiak.



© Donostia Zinemaldia | Desarrollado por: Yo Miento Producciones

Webgune hau berezko eta kanpoko cookies-az baliatzen da, erabiltzaile gisa esperientzia hobea eskaintzeko. Informazio gehiago Onartzea