Estreinaldi handietarako sail herrikoia; filmak 400 metro koadroko pantaila batean proiektatzen dira, ia 3.000 ikus-entzulerentzat prestatutako areto batean.

Gainera, goizero, Zinemaldiak ikastetxeekin aurrez hitzartutako programa bat jartzen du abian Belodromoan, non pantaila handian eta euskaraz proiektatzen baitira filmak. 2019tik zientziari lotutako gaiak izan ditu, eta Donostia International Physics Centereko (DIPC) zientzialariek egiten dituzte aurkezpenak.

Belodromoa, era berean, Zinemaldiko bi ekitaldi guztiz ezagunen agertoki ere bada: Euskadiko Orkestrak lehen larunbatean eskaintzen duen zinema-musikako kontzertuarena eta Zinemaldiaren azken eguneko saioarena, non, amaierako gala ez ezik, Sail Ofizialeko eta Perlak saileko azken filmak ere ematen baitira.